काठमाडौं । पुष ८ गते
आज नेपाली कांग्रेसले प्रदेश नम्बर २ मा पहिलो पटक प्रदेश अधिवेशन गर्ने भएको छ । प्रदेशको सभापति पदमा पार्टी सभापति शेरबहादुर देउवा पक्षबाट कृष्णप्रसाद यादव र शेखर कोइरालाको समर्थनमा विमलेन्द्र निधिनिकट रामसरोज यादवले उम्मेदवारी दिएका छन्। उम्मेदवारको मनोनयन मंगलबार गरिएको थियो।
बुधबार मतदान गर्ने कार्यक्रम रहे पनि दुई पक्षबीच विवाद हुँदा आजका लागि मतदान गर्ने कार्यतालिका बनाइएको थियो।जनकपुरस्थित गोपाल धर्मशालामा आज बिहान ८ बजेदेखि मतदान हुने निर्वाचन समितिले जनाएको छ।
आन्तरिक विवादले गर्दा बुधबार मतदान नभए पनि निर्वाचन समितिले भने तयारी नपुगेकोले सार्नुपरेको प्रतिक्रिया दिएको थियो।शेखर र विमलेन्द्र निकट कार्यकर्ताले राति मतदान गर्न नहुने हुटिङ गरेपछि बिहीबारका लागि मतदानको समय तोकिएको थियो।यसैबीच सभापति उम्मेदवार रामसरोज यादव पक्षले अर्का उम्मेदवार कृष्ण समर्थक युवालाई मुक्का हानेपछि चुनावी कार्यक्रम नै स्थगित गर्दै आजका लागि सारिएको थियो।
